Facebook Twitter Youtube RSS
  • Ahmedabad  
  • Login
  • Register
Home» Opinion» Security» When terrorist get access to nuclear bombs will the target be usa or surat

આતંકવાદીઓ પાસે ન્યુક્લીયર બોમ્બ આવે તો અમેરિકામાં ફોડે કે સુરતમાં ?

રજત પટેલ | December 30, 2013, 01:53 PM IST
when terrorist get access to nuclear bombs will the target be usa or surat

અમદાવાદ :

આપણે ત્યાં કાયદો અને વ્યવસ્થા જાળવવાનું કામ કરતી એજન્સીઓ અને મીડિયા પણ ક્યારેક સાવ બુધ્ધિનું દેવાળુ ફૂકયું હોય એ રીતે વર્તતાં હોય છે ને ગધેડાને પણ તાવ આવી જાય એવી વાતોના ગપગોળા છોડતાં હોય છે. ઈન્ડિયન મુઝાહિદ્દીનના મુખિયા રીયાઝ ભટકલના નામે જે નવો ગપગોળો બહાર આવ્યો છે એ તેનો નાદાર નમૂનો છે. ઈન્ડિયન મુઝાહિદ્દીન પ્રતિબંધિત આતંકવાદી સંગઠન છે ને આ સંગઠનના આતંકવાદીઓએ ભારતમાં ઠેરઠેર બોમ્બ બ્લાસ્ટ કરાવીને કેટલાય નિર્દોષોનાં લોહી વહાવ્યાં છે.

રીયાઝ ભટકલ અને યાસિન ભટકલ નામના બે ભાઈઓ આ આતંકવાદી સંગઠનના કર્તાહર્તા છે. રીયાઝ ભટકલ અત્યારે આપણી જેલમાં હવા ખાય છે જ્યારે યાસીન ભટકલ પાકિસ્તાનના કરાચીમાં જાસૂસી સંસ્થા આઈએસઆઈની નિશ્રામાં આરામ ફરમાવે છે ને જલસા કરે છે. મુંબઈમાં 26 નવેમ્બર 2008ના રોજ થયેલા ભીષણ આતંકવાદી હુમલા પછી આપણે આતંકવાદ સામે લડવા માટે નેશનલ ઈન્વેસ્ટિગેશન બ્યુરો (એનઆઈએ) રચેલી. આ એનઆઈએ, ઈન્ટેલિજન્સ બ્યુરો અને જુદાં જુદાં રાજ્યોની પોલીસ સાગમટે આ ભટકલની ઉલટતપાસ કરે છે. ભટકલ છ મહિના પહેલાં પકડાયેલો ને ત્યારથી આ ઉલટતપાસ ચાલે છે પણ કશો શક્કરવાર વળ્યો હોય એવું લાગતું નથી.

તપાસ એજન્સીઓને પણ આ વાતની ખબર પડે જ ને પોતે મફતના રોટલા તોડવા સિવાય કશું કરતા નથી તેવું લોકોને લાગે છે તેનો અહેસાસ થયો જ હશે એટલે તેમણે ભટકલની તપાસ દરમિયાન બહુ મોટી માહિતી હાથ લાગી હોય તેમ જાહેર કરી દીધું કે રીયાઝ અને યાસિન ભટકલની યોજના તો સુરતમાં પરમાણુ બોમ્બ ફોડવાની હતી. એનઆઈએ દ્વારા સત્તાવાર રીતે આ વાત નથી કહેવાઈ પણ સૂત્રોના માધ્યમથી કહેવાઈ છે. આ સૂત્રોનો દાવો છે કે અહમદ ઝરાર સિદ્દીબાપ્પા ઉર્ફે યાયીન ભટકલે ભારતથી રીયાઝને ફોન કરેલો ને પૂછેલું કે પાકિસ્તાનથી એક નાનકડો પરમાણુ બોમ્બ મળે કે ના મળે.

રીયાઝે વળતો જવાબ આપ્યો કે ભઈલા, આ તો પાકિસ્તાન છે ને અહીં તો પૈસા વેરો એટલે માગો એ મળે. યાસિને સુરતમાં પરમાણુ બોમ્બ ફોડવાની યોજના તેને સંભળાવી એટલે યાસિને તેને ચેતવ્યો કે પરમાણુ બોમ્બ ફોડીશું તો એમાં મુસ્લિમો પણ મરવાના જ.

યાસિન પાસે તેનો જવાબ તૈયાર હતો કે બોમ્બ ફોડતાં પહેલાં આપણ બધી મસ્જિદોમાં પોસ્ટર લગાવી દઈશું ને મુસ્લિમોને પોતપોતાના પરિવારો સાથે શહેર છોડીને જતા રહેવા કહી દઈશું.

રીયાઝ આ વાત પર ઝૂમી ઉઠ્યો ને તેણે કહી દીધું કે તો વાંધો નહીં. હવે  તુ તારે ઘરે જઈને નિરાંતે સૂઈ જા ને પછી ઉઠીને પરમાણુ બોમ્બ ફોડવાની તૈયારી શરૂ કરી દે.

જો કે યાસિન ઓગસ્ટમાં ઝડપાઈ ગયો તેમાં આ યોજના અમલી બનાવી શકાઈ નહીં. બાકી સુરતમાં પરમાણુ બોમ્બ ફૂટી ગયો હોત એવો દાવો આ સૂત્રોએ કર્યો છે. મીડિયાને તો ગોળનું ગાડુ મળી ગયું હોય એમ તેમણે આ સમાચારને ઉપાડી લીધા ને છાપી માર્યા.

યાસીને ખરેખર શું કહ્યું ને તેણે ખરેખર પરમાણુ બોમ્બની વાત કરેલી કે પછી એજન્સીએ અને મીડિયાએ ઝીંકાઝીંક જ કરી તે આપણને ખબર નથી પણ આ પ્રકારના સમાચાર બુધ્ધિનું પ્રદર્શન જ છે. પહેલી વાત તો એ છે કે ન્યુક્લીયર બોમ્બ એ કંઈ હલવો નથી કે ગમે તે આલિયો, માલિયો કે રીયાઝીયો તેને પેકેટમાં મૂકીને લઈ આવે ને તેને ફોડી દે. આ પ્રકારના સમાચાર લોકો સુધી પહોંચાડતાં પહેલાં ખરેખર તો પરમાણુ બોમ્બ શું છે તે સમજવું જોઈએ. આપણે ત્યાં હિન્દી ફિલ્મોમાં વિલનો તબાહી મચાવવા માટે મિસાઈલ ફોડવાની ને ન્યુક્લીયર બોમ્બ ફોડવાની વાતો કરે ને હીરો તેમને નાકામ બનાવે એ જોઈ આપણે ઝૂમી ઉઠીએ એ બરાબર છે પણ પરમાણુ બોમ્બ એ રીતે નથી બનતા. આરડીએક્સનો ઉપયોગ કરીને બનાવાતા બોમ્બ અને પરમાણુ બોમ્બમાં બહુ મોટો ફરક છે. પરમાણુ બોમ્બની તાકાત આરડીએક્સ કરતાં તો અનેકગણી હોય છે ને એ બોમ્બ બનાવવા શુધ્ધ યુરેનિયમ કે પ્લુટોનિયમ જોઈએ. ને સૌથી મહત્વની વાત એ કે તેને માટે લેબોરેટરી જોઈએ. ફિલ્મોમાં બતાવે છે તેમ વાયરનાં ગૂંચળાં ને રમકડાની ઈલેક્ટ્રોનિક્સ ઘડિયાળ જોડી દો એટલે બોમ્બ ના બની જાય. આ બોમ્બ સુટકેસમાં ભરીને લાવી શકાય તેવા પણ નથી હોતા. તેનો ઉપયોગ કરતાં પહેલાં ચોક્કસ વૈજ્ઞાનિક પ્રક્રિયા કરવી પડે છે ને એ પરમાણુ વિજ્ઞાન જાણનારા વિજ્ઞાનીઓ કરી શકે. રીયાઝ કે યાસિન ભટકલ જેવા ટૂણિયાટ આતંકવાદીઓનું  એ કામ નથી.

બીજી ને સૌથી મહત્વની વાત એ કે આતંકવાદીઓ પાસે પરમાણુ બોમ્બ હોય તો એ લોકો અત્યાર લગી ઝાલ્યા રહે ખરા ? ને એ બોમ્બ સુરતમાં ફોડવા માટે યાસિન ભટકલ જેવા ટૂણિયાટને પાર્સલ કરી દે ? સૌથી પહેલાં એ લોકો અમેરિકામાં જઈને એ બોમ્બ ફોડે ને અમેરિકા સુધી ના જઈ શકાય તો ઈસ્લામાબાદમાં અમેરિકાની એમ્બેસીને ઉડાવે કે પછી અફઘાનિસ્તાનમાં અમેરિકાના લશ્કરી થાણા પર બોમ્બ ફેંકે. ને સૌથી પહેલાં તો એ લોકો પાકિસ્તાનની ગાદી પર જ ચડી બેસે. અત્યાર લગી એવું બન્યું ખરૂ ? તેનો અર્થ એ કે આવો બોમ્બ છે જ નહીં.

તપાસ એજન્સીઓ સેન્શેશન ફેલાવવા આ બધી વાતો બહાર પાડે છે પણ તેની અસરો વિશે વિચારતાં નથી. બધાં જ લોકોમાં ગભરાટ ફેલાય એ તો તેની અસર છે જ પણ બે કોમનાં લોકો વચ્ચે પણ અવિશ્વાસનો માહોલ પેદા થાય એ તેની સૌથી ખરાબ અસર છે. ખરેખર તો આ આગ સાથેની રમત છે ને એ રમતથી બધાંએ દૂર રહેવું જોઈએ. રીયાઝ કે યાસિન જેવા લોકોને તો પરમાણુ બોમ્બ શું છે તેની ખબર ના પડે એટલે એ લોકો તો કદાચ ગમે તે લવારા કરી નાંખે પણ એજન્સીઓ કે મીડિયામાં બેઠેલા લોકો તો તેની ગંભીરતા સમજે કે ના સમજે ?

DP

 

(નોંધ – ઉપરોકત વિચારો લેખકના પોતાના છે જીજીએન તેની સાથે સહમત છે એમ માની લેવું નહીં.)

 

Reader's Feedback:

blog comments powered by Disqus

Today Cartoon

 

Opinion Poll

 
અરવિંદ કેજરીવાલ વારાણસીમાં મોદી સામે જીતી શકશે ?
હાં. જીતી જશે 78.91 %
નાં. હારી જશે. 20.45 %
કહીં ન શકાય. 0.64 %

SUBSCRIBE TO FREE "TOP NEWS UPDATES" DIRECTLY ON YOUR MAIL EVERY WEEK.

 

Email Address: